ᐱᙳᐊᖅ ᑲᑐᔾᔨᖃᑎᒌᑦ, ᐱᓕᕆᖃᑎᖃᖅᖢᑎᒃ ᒧᐊᕐ ᖃᑕᙳᑎᖏᓐᓂᒃ, ᖁᕕᐊᓱᒃᐳᑦ ᑐᓴᖅᑎᑦᑎᔪᓐᓇᕐᒪᑕ ᑎᓴᒪᑦ ᓄᓇᕗᒻᒥᐅᑦ ᑐᓂᔭᐅᓯᒪᓕᕐᓂᖏᓐᓂᒃ ᑖᓂᐅᓪ ᒧᐊᕐ ᐃᓕᓐᓂᐊᕈᑎᒧᑦ ᐃᑲᔫᑎᒥᒃ, ᑕᒪᕐᒥᒡᓗ $3,000−ᓂᒃ ᐱᑎᑕᐅᓂᐊᖅᖢᑎᒃ ᑮᓇᐅᔭᑎᒍᑦ ᐃᑲᔪᖅᑕᐅᓪᓗᑎᒃ ᐃᓕᓐᓂᐊᖏᓐᓇᕐᓂᖏᓐᓄᑦ. ᐅᑯᐊ ᓵᓚᒃᓴᖅᑐᑦ:
- ᕼᐄᓕ ᐊᕐᓇᕐᔪᐊᖅ ᓴᓂᕋᔭᖕᒥᐅᑕᖅ
- ᑳᓐᑎ ᐃᕙᓗᑦᑕᖅ ᓇᐅᔮᓂᕐᒥᐅᑕᖅ
- ᐊᐅᕋ ᑯᐊᓐ ᐃᖃᓗᖕᒥᐅᑕᖅ
- ᑲᐃᕋ ᑳᒻᐳᓪ ᐃᖃᓗᖕᒥᐅᑕᖅ
ᐃᓕᓐᓂᐊᕈᑎᒃᓴᖅᑖᕈᓯᐊᖅ, ᐊᑐᐃᓐᓇᐅᔪᖅ ᓄᓇᕗᒻᒥᐅᓄᑦ, ᐃᑲᔪᖃᑦᑕᖅᑐᖅ ᐱᑎᑕᐅᔪᓂᑦ ᑲᔪᓯᔪᒥᒃ ᐃᓕᓐᓂᐊᖏᓐᓇᕐᓂᕐᒥᒃ ᐊᔪᙱᓐᓂᕐᒥᒃᓗ ᐱᕙᓪᓕᐊᑎᑦᑎᓂᕐᒥᒃ, ᐱᑎᑕᐅᓪᓗᓂᓗ ᐃᖅᑲᐅᒪᓗᒍ ᑖᓂᐅᓪ ᒧᐊᕐ, ᐃᓕᓴᐃᓚᐅᖅᑐᖅ ᐱᙳᐊᖅ ᐃᖃᓗᐃᑦ ᖃᕆᓴᐅᔭᓕᕆᕝᕕᐊᓂᑦ. ᑖᓂᐊᓪ ᐊᐅᓪᓚᓚᐅᖅᑐᖅ ᑭᐊᓐᔭᒧᑦ ᑭᒡᒐᖅᑐᐃᔭᖅᑐᖅᖢᓂ ᑲᓇᑕᒥᑦ ᓄᓇᕐᔪᐊᒥᑦ ᑲᑐᔾᔨᖃᑎᒌᑦ ᐊᕙᑎᓕᕆᓂᖕᒧᑦ ᑲᑎᒪᑎᓪᓗᒋᑦ ᖃᖓᑕᓪᓗᓂ ᖃᖓᑕᓲᒃᑯᑦ ET302−ᒥᑦ ᑲᑕᖕᒪᑦ ᐃᑎᐆᐱᐋᒥᑦ.
“ᑖᓐᓇ ᐱᖓᔪᒋᓕᖅᖢᑎᒍ ᐊᕐᕌᒍᒥ ᐊᐅᓚᑦᑎᕗᒍᑦ ᑖᔅᓱᒥᖓ ᐃᓕᓐᓂᐊᕈᑎᒃᓴᖅᑖᕐᓂᕐᒧᑦ ᑭᐅᔭᐅᓂᖅᓴᐅᖃᑦᑕᓚᐅᖅᐳᒍᑦ ᑕᐃᒪᙵᓂᑦ,” ᐅᖃᖅᑐᖅ ᕋᐃᔭᓐ ᐋᓕᕗ, ᐱᒋᐊᖅᑎᑦᑎᔪᖅ ᐊᒻᒪ ᐊᐅᓚᑦᑎᔨᒻᒪᕆᒃ ᐱᙳᐊᒃᑯᓐᓄᑦ. “ᐊᓕᐊᓇᐃᒍᓱᒃᐳᒍᑦ ᑖᓂᐊᓪᑉ ᐊᒃᑐᐃᓂᖓ ᑲᔪᓯᖕᒪᑦ ᓄᓇᕗᓕᒫᒥᑦ ᑕᒡᕘᓇ ᐃᓕᓐᓂᐊᕈᑎᒃᓴᖅᑖᕐᓂᒃᑯᑦ.
ᐱᙳᐊᖅ ᐱᓕᕆᖃᑎᖃᖅᓯᒪᔪᖅ ᒧᐊᕐ ᖃᑕᙳᑎᖏᓐᓂᒃ ᐱᑎᑦᑎᔪᒪᓪᓗᑎᒃ ᑮᓇᐅᔭᖃᖅᑎᑦᑎᓂᕐᒥᒃ ᐋᖅᑭᒃᓯᒪᐃᓐᓇᖁᓪᓗᒍ ᐃᓕᓐᓂᐊᕈᑎᒧᑦ ᐃᑲᔫᑎ ᐊᕐᕌᒍᓄᑦ ᖁᓕᓄᑦ, ᐅᖃᖃᑎᖃᖅᐸᓪᓕᐊᓪᓗᓂᓗ ᐱᓕᕆᖃᑎᒋᔪᓐᓇᖅᑕᖏᓐᓂ ᐊᖏᒃᓕᒋᐊᕐᓗᒍ ᐊᑯᓂᐅᓂᑐᐊᕆᓐᖏᑕᖓᓄᑦ, ᑭᓯᐊᓂᑦᑕᐅᖅ ᐊᖏᓂᖓ ᐃᓕᓐᓂᐊᕈᑎᒧᑦ ᐃᑲᔫᑎᒧᑦ.
“ᑖᒃᑯᐊ ᑎᓴᒪᑦ ᐱᑎᑕᐅᓂᐊᖅᑐᑦ ᐊᔾᔨᒌᙱᑦᑐᓃᑉᐳᑦ ᐃᓕᓐᓂᐊᕐᓂᖏᓐᓂ ᑭᓯᐊᓂ ᐱᔪᒪᓂᖃᖅᑐᐃᓐᓇᐅᕗᑦ STEAM−ᒥ ᐊᒻᒪ ᐱᔪᒃᓯᓂᖃᖅᖢᑎᒃ ᐱᐅᓯᒋᐊᖅᑎᑦᑎᔪᒪᓪᓗᑎᒃ ᐃᓅᓯᖏᓐᓂᒃ ᓄᓇᕗᒻᒥᐅᖑᖃᑎᖏᑕ,” ᐅᖃᖅᑐᖅ ᐋᓕᕗ. “ᑖᓂᐅᓪ ᐊᓈᓇᖓ ᒃᓕᐅᔅ, ᐊᑖᑕᖓ ᑯᕆᔅ ᐊᒻᒪ ᐊᓂᖓ ᑕᐃᕕᑎ ᕿᒥᕐᕈᒃᑲᓐᓂᓕᓚᐅᖅᑖᖓ ᐊᔪᙱᑦᑐᓕᒫᓂᒃ ᐱᓇᔪᒃᑐᓂᒃ ᐱᓕᕆᑎᓪᓗᑕ ᐊᔪᕐᓇᖅᑐᒃᑰᖅᑎᓪᓗᑕ ᓂᕈᐊᖅᑎᓪᓗᑕ ᐃᓕᓐᓂᐊᕈᑎᒃᓴᖅᑖᕐᓂᕐᒧᑦ ᓵᓚᒃᓴᖅᑐᓂᒃ. ᑕᒪᑐᒪᓂ ᐊᕐᕌᒍᒥ, ᐊᕐᕌᒎᓵᖅᑐᓂ, ᐅᓄᖅᑐᓂᒃ ᐱᓇᔪᒃᑐᓂᒃ ᐱᓚᐅᖅᑐᒍᑦ, ᐊᒻᒪ ᓱᓕ ᓵᓚᖃᖅᑐᑦ ᐅᓄᖅᓯᒋᐊᒃᑲᓐᓂᖅᖢᑎᒃ.”
ᕼᐊᓕ ᐊᕐᓇᕐᔪᐊᖅ ᓴᓂᕋᔭᖕᒥᐅᑕᖅ ᐱᐊᓂᒃᓯᕙᓪᓕᐊᕗᖅ ᓯᕗᓪᓕᖅᐹᒥ ᐊᕐᕌᒍᒥ ᓄᓇᖃᖅᑳᖅᓯᒪᔪᑦ STEM-ᖑᔪᒥᑦ ᐱᓕᕆᐊᖑᔪᒧᑦ Lakehead ᓯᓚᑦᑐᖅᓴᕐᕕᒡᔪᐊᖓᓂᑦ.
ᑳᓐᑎ ᐃᕙᓗᑦᑕᓐᓇᖅ ᓇᐅᔮᕐᒥᐅᑕᖅ ᐊᕐᕌᒍ ᐱᖓᔪᒋᓕᖅᑕᖓ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᖓ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ.
ᐊᕉᕋ ᑯᕉᓐ ᐃᖃᓗᒻᒥᐅᑕᖅ ᓯᕗᓪᓕᖅᐹᒥ ᐊᕐᕌᒍᒥ ᐃᓕᓐᓂᐊᓕᖅᑐᖅ ᓯᓚᑦᑐᓴᕐᕕᔾᔪᐊᖓᓂ ᑐᕌᓐᑐᒥ ᓂᔾᔭᐅᓯᔭᕐᓂᕐᒧᑦ ᐃᓕᓴᕆᔭᐅᔾᔪᑎᑖᕋᓱᒃᖢᓂ, ᑐᕌᖅᑕᖃᓗᐊᖅᑐᖅ ᓂᔾᔭᐅᓯᔭᕐᓂᕐᒧᑦ ᐃᓕᓐᓂᐊᕐᓂᕐᒥᒃ. ᐱᔭᕇᓚᐅᖅᑎᓪᓗᒋᑦ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᓂᔾᔭᐅᓯᔭᕐᓂᕐᒧᑦ, ᑭᐅᕋᓐ ᐱᓇᓱᒍᒪᔪᖅ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ ᐃᓕᓐᓂᐊᖅᑎᑦᑎᓯᔨᙳᕐᓗᓂᓗ ᓄᓇᕗᒻᒥ.
ᑲᐅᕋ ᑳᒻᐳᓪ ᐃᖃᓗᖕᒥᐅᑕᖅ ᐊᕐᕌᒍ ᑐᒡᓕᐊᓂᑦ ᐃᓕᓐᓂᐊᓕᖅᑐᖅ ᑕᐃᑲᓂ ᑖᓪᕼᐊᐅᓯ ᓯᓚᑦᑐᖅᓴᕐᕕᒡᔪᐊᖓᓂᑦ, ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓴᕆᔭᐅᔾᔪᑎᑖᕋᓱᒃᑐᖅ ᖃᐅᔨᓴᖅᑐᓕᕆᓂᕐᒥᒃ (ᓂᕿᓂᒃ ᐱᕈᖅᑐᓂᒃ) ᓇᓗᓇᐃᖅᑕᐅᓯᒪᙱᑦᑐᒥᒃ ᓯᕗᓂᐊᒍᑦ−ᐆᒪᔪᓂᑦ ᑲᒪᒋᔭᖃᕐᓂᕐᒥᑦ.
ᐱᓇᔫᑎᑦ 2025−ᒧᑦ ᐃᓕᓐᓂᐊᕈᑎᒃᓴᒧᑦ ᐅᖃᐅᓯᐅᓛᖅᑐᑦ ᔭᓄᐊᕆᒥ. ᑐᑭᓯᒋᐊᒐᒃᓴᖅᑕᖃᒃᑲᓐᓂᖅᑐᖅ ᐅᕙᓂ.
ᖃᐅᔨᒋᐊᕐᕕᒃᓴᖅ
ᕗᐊᑦ ᐊᓪᓴᑉ
ᓂᐅᕕᐊᒃᓴᓕᕆᓂᕐᒧᑦ, ᑐᓴᐅᒪᔪᓕᕆᓂᕐᒧᑦ ᐃᓚᐅᑎᑦᑎᓂᕐᒧᓪᓗ ᐊᐅᓚᑦᑎᔨ
ward@pinnguaq.com
(705) 934-8322
